For tida lev eg inne i småbarnsbobla. Eg har to veldig kjekke gutar saman med sambueren min Stian. Når eg får litt tid for meg sjølv likar eg å trene styrke eller gå tur med ei lydbok eller podcast på øyra. Det er heller ikke usannsynleg at du finn meg i sofakroken med ein god krimserie. Eg er svak for sjokolade, soloppgangar, eit kaldt bad og kaffi.

Heilt sidan ungdomsskulen har eg vore glad i å fotografera – på den tida gjekk det mest i sjølvportrett, blomster, insekt og ikkje minst venene mine, som ofte fekk gjennomgå og måtte stille opp som modellar. Etter kvart utvikla interessa seg, og fotograferinga blei ein stor og viktig del av livet mitt. Å miste nokon i nær familie og ikkje lenge etterpå bli mor for første gong gjorde meg meir bevisst på kor fort tida går – og kor dyrebar ho er. Då eg var gravid med eldstemann, vaks lidenskapen for å dokumentera morskap, familie og mine eigne born. Eg innsåg kor viktig det er å ta vare på dei små, flyktige augeblikka som lett forsvinn i kvardagen. I 2021 tok eg steget om å satse på det eg har draum om nesten halve livet – å starta mi eiga fotobedrift. Eg ser på meg sjølv som utruleg heldig som får hjelpe familiar og brudepar å foreviggjera minnene frå både små og store dagar. Eg elskar verkeleg jobben min! Som fotograf er eg roleg og jordnær og eg har ei fotojournalistisk tilnærming når eg fotograferar. Det betyr at eg fokuserar på å fortelja ei historie gjennom bildene. Bildestilen skildrar eg som tidlaus og dokumentarisk – eg fangar dei tradisjonelle portretta, men også alle dei fine små, og store, øyeblikka der imellom.