Familiefotografering – Slik kan du best mogleg førebu deg
Dersom du les dette, vurderar du kanskje å ta med deg familien din for å bli foreviggjort saman? Eller kanskje du allereie har tinga fotografering saman med meg? Uansett, det er supert at du er her!
Eg gler meg til å fange dykkar personlege augeblink og vere med på å skape minner som varer. Men før me kjem dit, har eg laga ei lita guide for å gjere fotograferinga så enkel og kjekk som mogleg – både for deg og for barna.
Kle og fargeval
Det viktigaste er at alle føler seg komfortable i det dei har på seg, og det er absolutt ikkje nødvendig å gå ut og kjøpe nye klede for fotograferinga. Det som er viktig er å tenke på er kva for fargar som passar saman. Kle dykk gjerne i same fargeskala – utan å overmatche: med det meinar eg at de bør unngå at alle går med blå jeans og kvit t-skjorte. Det er fint å unngå travle mønster, (store) logoar eller sterke fargar. Jordfargar, naturtonar, mjuke pastellfargar, naturlege material som ull og lin fungerer veldig bra. Ein kjole med litt bevegelse i tek seg godt ut på bilder, og om sommaren er det veldig fint med bare armar og føter. Om vinteren er strikk og tjukke skjerf alltid eit godt val. Kleda skal sjølvsagt spegle personlegdomane til dykk, så vel gjerne noko som du føler deg fin og komfortabel i.
La dei eldre barna vere med i planlegginga
Er barna litt eldre, kan det vere ein god idé å la dei vere med å velje ut klærne sine. Dei vil kjenne seg meir med i prosessen og kanskje også få det gøy med å finne noko dei likar. I tillegg kan dei eldste barna ha gode forslag til aktivitetar me kan gjere når me skal fotografere. Kanskje dei har noko moro på hjartet, som å leite etter naturens skattar eller finne på ein leik som får heile familien til å le. Dette gjer det lettare for alle å føle seg meir komfortable, og me får gjerne meir spontane og genuine bilete!
Motivasjon
Det kan vere lurt å tenkje på noko som barna kan få som ein liten «premie» etter fotograferinga. Det kan vere favorittmat, ei lita leike eller kanskje ein kjekk aktivitet de skal gjere saman som familie etterpå. Eg anbefaler å vente med å gi mat eller snacks heilt til fotograferinga er ferdig. Dette hindrar klebrige hender, «gomlebileter» og små flekkar på kleda. Små motivasjonar som barna kan sjå fram til, gjer ofte stemninga ekstra god
Leik og latter er gull
Eg gjer mitt ytterste for at fotograferinga skal vere avslappa og gøyal. Eg byr opp til leik, tull og tøy. Me skal ha det kjekt saman! Leik, undring og litt kaos er faktisk det som gir dei aller beste bileta. Det er heilt greit at barna leikar og utforskar i løpet av sesjonen. Me tar det på barna sine premissar, og dersom dei treng litt pausar eller vil gå ein annan stad, så gjer me det.
Eg veit at mange foreldre er litt nervøse for at barna ikkje skal «oppføre seg» under fotograferinga. Men det er heilt greit! Det viktigaste for meg er å poengtere at me ikkje må bli irriterte dersom barnet ikkje vil gjere det som me vil. Barna våre er fantastiske, og me tek dei slik dei er.
Dersom det regnar eller noken blir sjuke
Vêret kan vere litt uforutsigbart, spesielt her på Vestlandet, men det meste kan me tilpasse oss! Dersom det bøttar ned, finn me ein ny dato for fotograferinga – det viktigaste er at alle får ein god oppleving. Men litt duskregn tålar me! Faktisk kan det gi bileta ein ekstra dose magi med mjukt lys og fine, naturlige dråpar. Om nokon i familien skulle bli sjuke, er det berre å gi meg beskjed. Då finn me ein annan dag som passar betre, slik at alle kan vere med og ha det fint under fotograferinga. Det skal vere ei god oppleving for heile familien!
Andre praktiske tips for å få dei beste bildene
For at fotograferinga skal gå så smidig som mogleg, er det lurt å unngå å ha med seg store baggar med klede, mat eller andre ting og tang. Eg fotograferar heile tida, og då er det enklare å halde fokuset på å fange fine augeblink utan for mykje støy. Det kan også vere ein god idé å tømme lommene for mobiltelefonar, nøklar og andre ting som kan vere synlege på bileta. Husk også å ta av deg sportsklokker – dette rådar eg til då eg streber etter eit tidlaust uttrykk i bildene, og det er best å vere så enkel og naturleg som mogleg. De treng heller ikkje ta med leiker eller «rekvisitter». Me brukar det me finn i naturen. Når me tar vekk så mykje av det ekstra, kan me berre konsentrere oss om det viktigaste – å ha det gøy saman og skape minner!
Ha det gøy og ver tålmodig
Hugs at det er ein heilt normal del av prosessen at ikkje alt går etter planen. Er barna litt tilbaketrekte eller kanskje litt uprudne, så er det heilt i orden. Me tek oss god tid til å fange dei beste augeblinkene. Det handlar om å skapa minner, ikkje å få alt perfekt.
Eg gler meg til å møte deg og familien din, og til å ta flotte bilder som fanger alle dei fine, ekte augneblinkane. Er det noko du lurer på før fotograferinga, er det berre å ta kontakt!
Legg igjen en kommentar