Tips til korleis de kan struktuere bryllaupsdagen frå start til slutt
Å lage ein god tidsplan for bryllaupsdagen handlar om å finne ein balanse mellom struktur og fleksibilitet. Dagen kjem til å fly av garde, og med ein realistisk tidsplan blir det enklare å nyte øyeblikka utan å kjenne seg stressa. Her er nokre tips for å lage ein chill tidsplan som passar dykkar dag.
Start med det viktigaste
Tenk på kva delar av dagen som er mest betydningsfulle for dykk. Er det vigsla, middagen, eller kvelden saman med gjestane? Bruk dette som eit utgangspunkt for tidsplanen og prioriter tid til å faktisk nyte desse øyeblikka.
Berekn god tid
Det er alltid lurt å legge inn litt ekstra tid mellom aktivitetane. Små forseinkingar kan skje – kanskje nokon treng ein siste finjustering på antrekket, eller kanskje de berre vil ha nokre minutt til å trekke pusten. Å ha litt slakk i planen gjer at dagen kjennest mindre stressande.
Døme på ein chill tidsplan
— Kl. 09.00–11.00: Morgonforberedelsar. Nyt ein roleg frukost, og sett av god tid til sminke, hår og påkledning.
— Kl. 11.30–12.30: First look (om de ønskjer det). Dette øyeblikket kan vere ein fin stund for å lande saman før dagen set i gang.
— Kl. 12.30–13.30: Vigsle. Hugs å legge til litt tid etterpå til gratulasjonar.
— Kl. 13.30–15.30: Portrettfoto. Ein avslappa og fin stund der vi tar bilete av berre dykk to.
— Kl. 15.30–16.30: Lett servering, mingling og gruppebilete. Gjestar kan kose seg medan vi tar familiebilete og fleire bilete av dykk.
—Kl. 16.30–18.30: Middag. La det vere tid til talar utan at det går på kostnad av maten. Vel gjerne ein toastmaster som er flink til å halde tiden og som kan sørge for god stemning blant gjestane.
— Kl. 18.30–19.30: Pause eller ein kort luftetur for dykk to. De kan også bruke denne tida til fleire bilete dersom lyset er fint.
— Kl. 19.30–20.30: Kake og kaffi. La gjestane mingle litt før kvelden held fram.
— Kl. 20.30–00.00: Dans og kveldsprogram. Om de ønskjer ei avslappa stemning, kan de planlegge få, men minneverdige innslag.
Halde det enkelt
Det er ikkje naudsynt å fylle kvar einaste time. Tenk heller på korleis de vil at dagen skal kjennest. Om de vil unngå at det blir for hektisk, kan de prioritere å kutte ned på talet på aktivitetar. Hugs at dette er dagen dykkar, og den treng ikkje sjå ut som andre sin.
Sett av tid til mingling
Ein viktig del av bryllaupsdagen er å kunne vere saman med gjestane og nyte stemninga. Pass på at de ikkje er opptatt med andre ting heile tida. Det er trass alt dykkar dag, og de fortener å kunne kose dykk og slappe av. Mingling gir dykk moglegheita til å få med dykk alle dei små, fine augeblikka som skjer rundt dykk.
Delegér oppgåver
Det er mykje som skal ordnast på ein bryllaupsdag, men det betyr ikkje at de må gjere alt sjølve. Delegér oppgåver til vener og familie som står dykk nær. Kanskje nokon kan passe på tidsskjemaet, medan andre hjelper til med dekorasjonar eller servering. Å fordele ansvaret gjer at de kan fokusere på å vere til stades og nyte dagen.
Ikkje stress om planen sprekk
Det er heilt vanleg at ting ikkje går heilt etter planen, og det er ingen grunn til å stresse av den grunn. Eg har enno til gode å vere med i eit bryllaup der alt går knirkefritt eller der tidsplanen ikkje blei sprengt. Desse små «avvika» blir ofte dei beste historiane å sjå tilbake på. Ta det som det kjem, og hugs at det viktigaste er at de får nyte dagen saman.
Lytt til hjartet (og hovudet)
Til sjuande og sist er det viktig å ha ein tidsplan som kjennest riktig for dykk. Snakk saman om kva de drøymer om, og ver realistiske med kva som faktisk er mogleg å få til.
Om de er usikre, er eg alltid her for å gi innspel eller hjelpe med å finne rom i tidsplanen til å skape dei minna de vil ha med dykk. Eg gler meg til å følgje dykk gjennom denne dagen!
Legg igjen en kommentar